Máis de 30 establecementos participarán na campaña do comercio de Chantada na que se ofertarán grandes descontos de fin de tempada. Roupa, calzado, complementos, cosmética, artigos de decoración, papelería, artigos de iluminación son algúns dos produtos que veciños e visitantes poderán atopar o día 20. A campaña celebrase durante todo o día, sendo as 23:00h a hora tope fixada.

Esta campaña, xunto coa colaboración realizada coa Asociación Amigos do Folión, que consistiu no reparto de pezas decorativas propias do folión para que os comerciantes e hostaleiros colocasen nos seus establecementos e a realización outro ano máis do Concurso de Escaparates, foron a aposta da Asociación de Empresaarios de Chantada neste mes de agosto para que os vecinos e visitantes gozasen do comercio e da hostalaría da vila.

En Sarria durante este venres e o sábado os establecementos participantes no outlet de verán ofrecerán grandes descontos, co obxecto de dar saída aos stocks de anos anteriores e/ou o produto excedente da tempada de verán. Calzado, roupa, roupa infantil, agasallos, complementos, fogar, ……. unha ampla variedade de produtos que poderán adquirir os clientes a un prezo ideal. As ofertas abarcarán todo tipo de produtos e servizos ofrecidos polos locais adheridos a esta iniciativa. Esta oitava edición conta coa participación de 27 establecementos. Todos eles contarán cunha zona “Outlet” onde os clientes poderán beneficiarse dos produtos a prezo de saldo. Un distintivo visible nos escaparates identificará aos comercios participantes, os cales abrirán as súas portas no seu horario habitual.