O conselleiro de Cultura, Educación e Universidade, Román Rodríguez, aproveitou a visita deste martes 20 de setembro a Sober para anunciar a realización de obras de mellora de eficiencia enerxética e accesibilidade no CEIP Virxe do Carme. Calcúlase que os traballos ascenderán a uns 260.000 euros.
Con este anuncio puxo en valor o compromiso da Xunta de Galicia co rural galego, dotándoo de centros en igualdade de condicións e calidade educativa ca nas cidades. “Unha oferta de proximidade que fai que en centros como o colexio CEIP Virxe do Carme de Sober se duplicara a matrícula na última década”, destacou.
Nesta liña de compromisos co ensino no rural, exalzou o transporte escolar en Galicia, “coa rede de transporte escolar máis grande do Estado”, dixo; e lembrou tamén que programas como a estratexia do Goberno galego para as bibliotecas escolares inclúen accións específicas para o rural, como o programa Bibliotecas LÍA.2. Programa do que forma parte o CEIP Virxe do Carme xunto con outros 24 centros, case todos do rural galego.
