Obradoiro maxistral de Elena Ferro en Monforte

A emprendedora galega de éxito que triunfa como zoqueira dende o rural estivo no IES A Pinguela.

Elena Ferro. Foto: IES A Pinguela

Elena Ferro, a emprendedora e innovadora zoqueira de Merza, no Concello de Vila de Cruces, vén de impartir un obradoiro/demostración do seu traballo ao alumnado do ciclo medio de Calzado e Complementos de Moda do IES A Pinguela.

Elena mostrou os seus deseños e a evolución dos zocos que fabrica, realizou todo o proceso de elaboración dunha zoca clásica, dirixiu a montaxe e tamén iniciou aos presentes na súa decoración.

Dende o rural e con paso firme, esta emprendedora galega que herdou o obradoiro familiar inaugurado polo seu avó no ano 1915, puxo en valor un calzado histórico da cultura galega, os zocos. En palabras dela: “os zocos que deseño representan a nosa identidade cultural e social”.

Nas súas creacións, vangarda e tradición danse a man para calzar a novas xeracións de galegos e galegas, pero tamén a moita outra xente a nivel mundial seducida polos deseños e a calidade deste tipo de calzado.

Segundo nos traslada Enrique Sampil, o director do centro, “foi unha xornada intensa pero moi creativa para toda a familia profesional de Téxtil do IES A Pinguela”.

Foto de despedida de Elena Ferro / IES A Pinguela

DEIXAR UN COMENTARIO

Please enter your comment!
Please enter your name here