O vicepresidente económico e conselleiro de Economía, Empresa e Innovación, Francisco Conde, visitou este venres, 21 de xaneiro, o parque industrial de Chantada e a empresa Daveiga, aos que se referiu como dous exemplos das capacidades instaladas en Galicia para xerar emprego e riqueza no rural. Daveiga é unha empresa especializada na produción das recoñecidas galletas mariñeiras —das que elabora cada día 4000 quilos— e que está a ampliar as súas instalacións en máis de 5.000m². Conde cualificouna como unha empresa comprometida coa calidade, os traballadores e o territorio á que a Xunta leva apoiado no seu proceso de dixitalización e internacionalización.
A subministración eléctrica e as melloras de depuración son actuacións que a Xunta leva apoiado a través das liñas de axuda para a mellora dos parques empresariais de Galicia, consciente de que é clave para favorecer a actividade das empresas asentadas e das que buscan instalarse nunha área industrial que responda ás súas necesidades.
Foto: Prensa Xunta de Galicia
Modernización das infraestruturas dos polígonos empresariais galegos
Este ano son máis de 8M€ os que a Administración autonómica destina en toda Galicia para modernizar as infraestruturas dos polígonos empresariais galegos, tanto viarias como de xestión de residuos, depuración de augas ou sistemas de vixilancia e antiincendios (3,2M€). Tamén para apoiar a construción, a reforma ou o equipamento de naves nas cales se vaian implantar viveiros industriais (1,5M€). E para desenvolver melloras enerxéticas (3,6M€), como o reforzo e extensión das redes de distribución eléctrica; ou, como novidade este ano, para a instalación de servizos de subministración de gas e hidróxeno.
Trátase de tres liñas axudas, que se convocarán o vindeiro 26 de xaneiro, para impulsar a competitividade económica dos concellos galegos que contribúen a captar novos investimentos cara o tecido produtivo. Desde a súa posta en marcha, permitiron impulsar 690 proxectos de mellora e modernización de infraestruturas, viveiros industriais e proxectos de redes de distribución.
