Este venres presentouse en Fitur, no stand de Galicia, a nova campaña do Consorcio de Turismo da Ribeira Sacra, “Ribeira Sacra, agora si, Reserva da Biosfera“.
Participaron do acto, o Presidente do Consorcio de Turismo, Luis Fernández Guitián, a Directora Xeral de Patrimonio Natural, Belén Mª do Campo Piñeiro, o Vicepresidente da Deputación Provincial de Ourense, Rosendo Fernández Fernández, o Presidente da Deputación Provincial de Lugo, José Tomé Roca e a Directora de Turismo de Galicia, Mª Nava Castro Domínguez
Completaron o aforo dispoñible na sala os Delegados Territorias da Xunta de Galicia, Deputados, alcaldes e concelleiros da zona, Presidente do Consello Regulador e da Asociación Empresarial de Turismo Rural, empresarios turísticos do territorio, axentes de viaxes, produtoras audiovisuais e medios de comunicación.
O máis reiterado e resaltado de xeito unánime polas autoridades que tomaron a palabra é o modelo de unión que se dá en Ribeira Sacra, único en Galicia, e o bo momento que estamos a vivir. Tanto as institucións como o resto de xeodestinos de Galicia recoñecen que Ribeira Sacra é o destino de moda na Comunidade e que vive un dos seus mellores momentos, a pesares da situación delicada no ámbito sanitario.
A cita completouse abordando a declaración como Reserva da Biosfera e presentouse nova guía turística e a marca que se implementará a partires de agora polas diferentes entidades implicadas no territorio. A nova imaxe reflexa que natureza e patrimonio en Ribeira Sacra son unha estrela, que fala de turismo, de sostenibilidade e de unión.
