“A saúde e dereitos das traballadoras, xunto co das usuarias que tamén están a sufrir un servizo inadecuado, é algo que non lle preocupa a este goberno municipal. Pero a oposición intervirá na nosa defensa, lendo o documento no que comentamos todas as irregularidades,” sinalan desde o SAF.

As traballadoras deste servizo fixeran unha petición formal ó concello para que a compañeira Elisabeth, unha das despedidas, cuxo despido foi anulado pola xustiza, intervira no pleno para dar a coñecer “a situación e a indefensión na que se atopan as traballadoras ante os reiterados incumprimentos por parte da empresa SAMAIN.”

As traballadoras do SAF aseguran que os motivos son mais que suficientes para solicitar o cese da concesión e que o servizo volva a ser público “para beneficio de todos.”

Esixen a remunicipalización do servizo de atención no fogar e recuperar unha atención de calidade para todas as usuarias, e cese a temporalidade coa que se está a prestar o servizo. Unha temporalidade que a sofren tamén as persoas usuarias que ven como cada día son atendidas por unha traballadora diferente na meirande parte dos casos.

Desde o SAF con respecto ao pleno do día 10 afirman, “Alí estaremos, e queira ou non, escoitará as nosas denuncias de man da oposición que si se preocupa polo servizo e a saúde das traballadoras e usuarias.”