HomesociedadeJesús Benavides, o almeriense de Pantón que “xoga coa motoserra coma se...

Jesús Benavides, o almeriense de Pantón que “xoga coa motoserra coma se fose un pincel”

Nesta colaboración coñecemos como é o traballo deste cociñeiro reconvertido a escultor que chegou a estas terras “por consello da súa neuróloga”, segundo afirma nesta entrevista.

Publicado o

POR
Segredos de Pantón
- Advertisement -

O colectivo Segredos de Pantón, colaboradores de Xornal de Lemos, dannos a coñecer nesta ocasión a unha persoa ben curiosa: Jesús Benavides. Veu de Almería sendo cociñeiro e agora dedícase á escultura en madeira con motoserra no seu lugar de acollida, a aldea de Cangas, no Concello de Pantón.

Unha carta de presentación, tras pedirlle os entrevistadores ao entrevistado que se describa en 2 oracións e pico…

“A miña maior paixón é totalmente subxectiva, cando todo o meu razoamento o baseo sobre feitos obxectivos. Non se que sairá, pero faime máis feliz que un can con 2 rabos”.

Jesús Benavides. Foto: Guillermo Sotelo

Pero vaiamos á entrevista…

Como chega un cociñeiro almeriense a unha aldea de Pantón?

Circunstancias da vida. Un consello da miña neuróloga. Un paraíso. E agora unha paixón infinita.

De que forma comeza a traballar a madeira para facer esculturas?

Pois o primeiro é elixir o tronco, o que me chame. Logo, cun cigarro doulle voltas, obsérvoo, pregúntolle, charlo con el ou ela. Chegamos a un acordo e fágoo inmortal.

E que técnicas emprega para facelas?

A técnica é tan sinxela como divertida. Xogar coa motoserra coma se fose un pincel. E co tronco coma se fose un lenzo en 3 dimensións.  Quitarlle o que lle sobra e acabar dándolle o detalle a man, sempre. A máquina axúdame, non me fai o traballo. As miñas mans corrobórano.

Ferramentas en man. Foto: Guillermo Sotelo.

“A máquina axúdame, non me fai o traballo. As miñas mans corrobórano”

As súas esculturas toman tanto formas da natureza, coma de películas de culto ou de seres extraplanetarios. De onde toma a súa inspiración?

A inspiración é caprichosa. Ás veces é pueril e quero facer un monstro de Tasmania. Ás veces tórnase melancólica e todo se volve retorto. Ás veces permítome un freestyle e fago un predator. A cuestión é xogar. Son un neno duro.

Escultura de Jesús Benavides. Foto: Guillermo Sotelo.

E xa ten vendido algún dos seus traballos?

Algunha peza vendín, aínda que realmente non é a miña prioridade (segundo a miña muller debería selo) peeero, é a miña terapia, é a miña enfermidade e só eu sei e podo xestionalo. Con todo son realista, non levo nin un ano facendo isto e fago o que fago, necesito tempo, e présa que non teño… a ecuación dá o resultado que eu quero. A putada é cando che rouban o teu traballo. Iso é duro.

Por un cartel que hai na súa aldea, Cangas, sabemos que houbo un incidente coa Deputación de Lugo. Que foi o que aconteceu?

Pois que esa mañá tocoume a min. Teñen grandes ideas para o pobo como poñernos fibra óptica… infinitamente máis importante que ter rede de sumidoiros pública que non temos, por exemplo. E ben, pouco máis. Péchanme unha porta, pois motosérroa e convértoa en arte.

Ten obras súas por moitos lugares do concello. Onde as podemos ver e por que están neses lugares?

Gústame encher a miña aldea de arte. De cousas raras. De sorpresas nun camiño que nun principio se tornaba aburrido. Converter o meu pobo nun vértice de arte multidisciplinar, aproveitando a Ribeira Sacra e as habilidades dos meus veciños coas súas mans e diferentes materias e materiais. É o que máis me sorprendeu cando cheguei aquí. E creo que algo se me contaxiou.

“Gústame encher a miña aldea de arte. De cousas raras. De sorpresas nun camiño que nun principio se tornaba aburrido”

Agora mesmo teño unhas esculturas en Cangas e o alcalde de Ferreira, Don José Luis, por mor do problema coa Deputación, tivo a ben cederme un espazo. Deume a opción de elixir e elixín o merendeiro de Casebio. Desde Ferreira dirección Serode, Arribada, etc. A 300 metros estou a montar unha expo ao aire libre aproveitando a beleza da contorna.

Un orixinal botelleiro obra de Jesús Benavides. Foto: Guillermo Sotelo.

Ten en mente algún proxecto ou algo especial?

Teño un proxecto guapísimo, pero para todos e todas: unha casa da arte. Un lugar onde collan todas as disciplinas e poder vender os nosos produtos sen ter que depender de ninguén. E sobre todo, darlle vida a Ferreira. Posibilidades ten, agora hai que ver se sabemos aproveitalas. Moitas grazas polo apoio e pola axuda. Sodes xeniais.

“Teño un proxecto guapísimo, pero para todos e todas: unha casa da arte”

ÚLTIMAS

‘Ok(c)toberfest’ no barrio de Carude, en Monforte

O popular barrio de Carude, en Monforte de Lemos, vivirá este sábado unha xornada...

Sarria celebra dez anos do Esmorga Fest os días 17 e 18 de outubro

O festival comeza o venres 17 ás 20:00 horas coa apertura de portas na...

Publicadas as listaxes definitivas de admitidos no Programa Activa de Monforte que abre prazo extraordinario para cubrir vacantes

Xa están publicadas na páxina web municipal as listaxes definitivas de persoas admitidas nas...

Prodeme participa no Meeting Internacional Special Olympics 2025

Son 9 os deportistas de PRODEME quen viaxaron a Castelló, 7 xogadores compiten na...