No verán do 2020, despois do confinamento, comezábase a falar da nova normalidade, que durante este tempo foi máis ben anormal, sen embargo neste 2022 parece que unha posible nova normalidade de asoma.
No sur da provincia de Lugo o entroido celébrase como antes da pandemia e os concellos teñen programados os seus desfiles. Monforte prepara a Feira Medieval, Taboada pospón para abril a Festa do Caldo de Ósos e os concellos que celebran as súas Feiras do Viño confían en facelas este ano, mentres a D.O. Ribeira Sacra volve ás feiras internacionais que se comezaron a celebrar e despois do parón do ano pasado, volve a organizar este venres a cata de calificacion da última colleita.
Isto dá boa mostra de que as axendas culturais, promocionais, gastronómicas,… que impliquen á hostalería volven a parecerse ao que eran. Para completar ese proceso cara a normalidade, este mércores despois da reunión do comité clínico, o Conselleiro de Sanidade, Julio García Comesaña, anunciaba que esta fin de semana suavízanse as restricións en Galicia e que a hostalería pode deixar de pedir o certificado COVID. Tampouco será necesario que realicen o rexistro de usuarios e os topes de comensais por mesa soben: de 8 a 10 en interiores e de 15 a 20 no caso das terrazas.
Este novo contexto axudará a impulsar algunhas citas gastronómicas que se celebran no sur da provincia de modo inmediado, a XIV Festa do Cocido do Porco Celta da comarca de Sarria, o XIV Estase Cocendo na Ribeira Sacra ou as IV Xornadas Gastronómicas Pratos de Culler en Chantada.
XIV Festa do Cocido do Porco Celta na comarca de Sarria
Este luns o Hotel Alfonso IX de Sarria acollía a presentación da XIV Festa do Cocido do Porco Celta na comarca de Sarria que nesta ocasión cambia de formato. Do 26 de febreiro ao 1 de marzo 7 establecementos ofrecerán cocido de porco celta con previa reserva: Hotel Alfonso IX, Hotel Roma, O Chanto e D´ Orixen en Sarria e Hotel A Veiga, Mesón A Pontenova e Albaroque en Samos. E terán tapas e racións de porco celta, Cafetería Central e D´ Orixen en Sarria e Cantina de Renche en Samos.
Esta cita sácase adiante coa colaboración dos concellos de Sarria, O Incio, Láncara, Paradela, Páramo, Samos e Triacastela, a Deputación de Lugo, a Xunta de Galicia, Asoporcel, Embutidos Teijeiro, Panadaría Pallares e Sarria 100, Asociación de Hostalería e Turismo do Camiño Francés.
XIV Estase Cocendo
A Asociación Provincial de Empresarios de Hostalería e Turismo de Lugo (Apehl) presentará este xoves a décimo cuarta edición do Estase Cocendo. O acto terá lugar no salón do Centro do Viño da Ribeira Sacra de Monforte de Lemos ás 18:00 h.
As Xornadas do Cocido de Entroido da Ribeira Sacra celebraranse por toda a comarca dende o vindeiro 26 de febreiro ata o 27 de marzo, ambos incluídos.
O presidente da Apehl, Cheché Real, subliña que “son moitos os establecementos hostaleiros de toda a Ribeira Sacra os que ofrecerán tapas, menús e suxerencias especiais referentes ao cocido e todos eles estarán identificados co cartel do certame”. No seu interior todos aqueles interesados disporán de dípticos informativos coa relación de toda a información do evento.
Durante o mes dedicado ao cocido tamén están previstas diversas actividades para que a xente se anime a saír e volverase a sortear o porco de máis de 100 kg entre todos os que consuman ou participen das diferentes ofertas do Estase Cocendo. No acto de presentación é xa unha tradición contar cun compadre ou cunha comadre protagonista do acto, “nesta ocasión faremos unha homenaxe especial a todos os sanitarios e sanitarias pola seu labor durante esta pandemia”, finaliza.
IV Xornadas Gastronómicas de Pratos de Culler
En Chantada a Asociación de Empresarios de Chantada e cca Ribeira Sacra pon en marcha as IV Xornadas Gastronómicas de Pratos de Culler que se celebrarán os días 25-26 e 27 de febreiro a partir das 20.00h.
Participan:
1.- A Viñoteca – Caldereta
2.- Bar Parada – Potaxe de entroido.
3.- Cafetería Universal – Aquí hai tomate!
4.- A Faragulla – Fabas de Lourenzá con chourizo , morcilla e panceta de porco celta.
5.- Café Cantón – Ouro en crema.
6.- Cafetería Santa Ana – Garavanzos con costela.
7.- adaRosa tapería – Callos adaRosa.
8.- Bar Mánix – Caldo de Mar-ga
9.- Carballeira – Potaxe de cuaresma.
10.- O Casino – Delicia doce do Casino.
11.- Mesón Mogay – Caldo galego con chourizo e tenreira.
