O Concello de Ribas de Sil aproveita os meses de verán para ofrecer diferentes actividades culturais e de lecer que axuden a cubrir as axendas de veciños e visitantes. Para iso, vén de presentar días atrás unha programación na que se combinan propostas para a cativada, con propostas familiares e algunha para público adulto.
Este venres 26 de xullo comezou o ciclo cun espectáculo de narración oral a cargo de Caxoto no Anfiteatro da Praia Fluvial.
A seguinte actividade levará, ao mesmo escenario que o anterior, unha proposta do mago Dani Polo baixo o título “Combina”. Trátase dun espectáculo que combina maxia, humor e participación do público.
ACTIVIDADES EN AGOSTO
O 3 de agosto volve a narración oral tamén ao anfiteatro da Praia Fluvial de San Clodio coa contadora Raquel Queizás. Poñéndose na pel dunha peregrina, esta ten que gañarse o sustento actuando para a xente que está aloxada na pousada.
Días despois, o 14 de agosto preséntase cunha xornada completa pensada especialmente para a cativada. Na Praia Fluvial haberá inchables en horario de mañá e de tarde; das 11 ás 14:00 horas pola mañá e das 17:30 ás 19:30 h. pola tarde. Para as 20:00 h. outra proposta interpretativa a cargo de Animar-T Teatro na que se contará “A historia de Martín”, relato sobre a hiperactividade e a capacidade de cambiar o mundo dende un mesmo e poñendo en xogo os valores. O remate a esta xornada poñerao Estefanía Fernández, a monfortina de La Voz Kids, cun concerto na Praza do Concello ás 23:00 h.
O día 15 de agosto, tamén na Praza do Concello e ás 23:00 h. está programado un concerto da Banda de Música de Lourenzá; e o venres 16 na Praia Fluvial terá lugar o III Rock & Viño, coa banda de rock Doc Magoo’s como protagonista ofrecendo un concerto pola noite.
