Francisco Conde agradeceu tanto á Asociación de Xoves Empresarios de Lugo como ao conxunto de emprendedores da provincia o seu compromiso por construír unha Galicia en positivo, a pesar do complexo escenario. Conde puxo de relevo a capacidade de resistencia e de adaptación aos cambios que están a demostrar os empresarios galegos e lucenses. Como exemplo, lembrou que Galicia está a vivir o seu mellor ciclo exportador, e que as exportacións da provincia sumaron en 2021 un total de 723 millóns de euros, un 23,6% máis que no ano anterior. Ademais, medraron nun 8,8% en comparación con 2019, é dicir, melloraron os resultados prepandemia. En 2021 botaron a andar na provincia de Lugo 363 empresas, case unha ao día, un 13,4% máis que o ano anterior, e de novo situándose por riba das cifras anteriores á covid. Así, o ano pasado constituíronse 15 empresas máis en Lugo que en 2019

Pola súa banda José Tomé Roca puxo en valor o compromiso de AJE “coa promoción e coa difusión da cultura emprendedora, coa innovación empresarial e coa creación de emprego” e recoñeceu a importancia dos empresarios e empresarias galardoados, que “representan o talento e a capacidade de emprendemento que precisa Monforte, a Ribeira Sacra, a provincia de Lugo e Galicia para progresar”.

Os Premios AJE constitúense coma unha mostra “do talento, das ideas e das oportunidades que ten a nosa xente nova e o noso territorio”, un territorio do que o Presidente insistiu en desterrar o calificativo de baleiro: “Non hai unha provincia de Lugo baleira, nin unha Galicia baleira. Hai unha provincia de Lugo e unha Galicia chea de talento, de ideas e de oportunidades”. Tamén recordou o compromiso co tecido empresarial das dúas administracións que xestiona, como os plans especiais de apoio ós sectores produtivos para axudar a paliar os efectos da crise sanitaria.

En Monforte referiuse á posta en marcha de accións coma o Programa de fomento da iniciativa empresarial, polo que dende o Concello se conceden anualmente axudas ás empresas que xeren novos postos de traballo ou de autoemprego. Tamén destacou a posta en marcha de diversos Obradoiros de Emprego ou o programa Coworking Ribeira Sacra, que este ano alcanzará a súa 6ª edición e do que saen novos proxectos de negocio.

O Polígono do Reboredo, unha oportunidade de chan industrial para os empresarios

O Alcalde de Monforte tamén salientou o traballo desenvolvido dende o Goberno municipal para dinamizar e impulsar o Polígono industrial do Reboredo do que só quedan tres parcelas por vender e no que se instalará un viveiro de empresas, “un polígono no que hai uns anos ninguén cría, do que ninguén falaba, e que dende o Concello decidimos dinamizar e desenvolver, a través dun intenso programa de promoción e dunhas melloras moi importantes”.

VIII Premios AJE

Os premiados e premiadas foron os seguintes:
-Na categoría de Accésit Innovación 2021: INNOGANDO
-Na categoría de Accésit Responsabilidade Social Empresarial 2021: MEDRAR SMART SOLUTIONS
-Na categoría de Premio Xove Iniciativa Emprendedora 2021: MFC.ARQ
-Na categoría de Premio Xove Empresario/a 2021: ESTATI.CO