Nesta terceira edición foron seleccionados 80 pobos de toda España, entre os que se atopa o de Quiroga, para participar nun programa nacional que ata a data conseguiu que 19 concellos de 14 provincias gañen poboación, maioritariamente parellas de entre 40 e 50 anos e con fillos. Bóveda xa forma parte tamén desta inciativa.

O Concello de Quiroga pretende ademais enlazar este programa coa posibilidade de desenvolvemento que ofrece a Aldea Modelo de Bustelo de Fisteus, que nestes momentos ten 10 hectáreas de terreo preparadas para a súa explotación.

O proxecto ideado por AlmaNatura e impulsado por el Grupo Red Eléctrica e IKEA, coa colaboración de Triodos Bank, Fundación Triodos, Correos e Reale Seguros, ten como propósito impulsar a repoboación nas áreas rurais facilitando o contacto de persoas que desexen facer realidade o  seu proxecto de emprendemento no medio rural con pobos en busca de novos habitantes.

O compromiso que asume o Concello de Quiroga é que existan dúas vivendas que se poidan alugar, algo que pode ser en calquera lugar do municipio. Pola súa parte, a plataforma Holapueblo divulgará que Quiroga é un dos concellos seleccionados e que reúne as condicións idóneas para que persoas emprendedoras podan levar a cabo os seus proxectos. A plataforma encárgase de mentorizar e acompañar ás persoas emprendedoras a instalarse e desenvolver as súas ideas de negocio.