A cita de Pantón defínese polo carácter diferenciador da viticultura da zona, que vén dado pola súa situación xeográfica ao atoparse entre as ribeiras de tres ríos (Cabe, Sil e Miño), que producen uvas con características propias.

Nesta edición da Feira participaron 8 adegas: Alma das Donas, Casa Moreiras, Finca Míllara, Ciudáseis, Nogueiras, Capilla, Don Ventura e Corzoás, esta última acábase de incoporar como nova adega no concello. As adegas e as panadarías Tarrazo e Chimpa, así como a empresa Cachenas de Pantón recibiron galardóns polos seus traballos, acto que se desenvolveu despois da lectura do pregón a cargo de José Moriño Cuba, que fora xefe do ICA e impulsor da posta en marcha do selo de calidade D.O. Ribeira Sacra.

Mouriño Cuba tamén escritor e membro da Academia Galega de Gastronomía, ensalzou as potencialidades e recursos do concello de Pantón, fixo apoloxía do viño e lembrou os comezos do que hoxe é o estandarte do territorio, a D.O. Ribeira Sacra. Tamén Mouriño Cuba recibiría agasallo institucional desta cita que contou con importante representación institucional. Entre outros o conselleiro do Medio Rural, José González, a subdelegada do Goberno en Lugo, Isabel Rodríguez; ou o presidente da Deputación, José Tomé Roca, ademais de alcaldes da contorna.

O alcalde, José Luis Álbarez, destacou a importancia da declaración de Festa de Interese Turístico Galego e amosou a satisfacción por recuperar esta importante celebración para o concello, despois de dous anos de pandemia.

Pola súa parte, a Deputación amosou a súa satisfacción por colaborar co evento aportando 10.000 euros a través do Plan Único. “A actividade vitivinícola é un bo exemplo da potencialidade do sector primario na provincia”, declarou José Tomé.

A seguinte cita coas Feiras do Viño na Ribeira Sacra será a de Chantada que se celebra os días 3, 4 e 5 de xuño.