A asociación veciñal Campo do Cruceiro de Santa Catalina de Pousada, da Pastoriza, desprazouse ata os municipios de Taboada e Chantada para coñecer a igrexa de Taboada dos Freires, a área recreativa Ponte Mourulle, o casco histórico de Chantada, o convento de San Salvador de Asma e o paseo fluvial, ademais de facer unha parada nunha adega.
A asociación de familiares e enfermos de alzheimer e outras demencias de Lugo, achegouse a Quiroga, onde visitaron o Museo Xeolóxico, o miradoiro de Campodola, e coñeceron unha adega.
A asociación de veciños de Crecente, da Pastoriza, visitou os concellos de Pantón e Carballedo. No seu percorrido descubriron o convento do Divino Salvador de Ferreira de Pantón e unha adega, entre outros reclamos turísticos da comarca.
A Asociación de Comerciantes e Empresarios da Pastoriza (ASAPA), visitou este venres a Granxa Gayoso Castro. Dende alí partiron cara Taboada e Chantada para coñecer a igrexa de Taboada dos Freires, a área recreativa Ponte Mourulle, o casco histórico de Chantada, o convento de San Salvador de Asma e o paseo fluvial, e coñeceron unha adega.
Tamén onte a veciñanza de San Xosé de Vilaseca de Riotorto achegouse ao concello do Incio para visitar o encoro de Vilasouto realizando unha ruta circular a pé, visitaron á igrexa de San Pedro Fiz de Hospital, a aldea de Ferrería e o monumento ao mamut.
Turismo de proximidade
Máis de 3.000 persoas de 135 asociacións beneficiaranse das viaxes gratuítas pola xeografía lucense nesta segunda tempada da iniciativa coa que a institución provincial apoia a actividade do turismo, a hostalería e o comercio local. As saídas terán lugar en dúas quendas que permitirán coñecer a provincia en primavera, entre marzo e xuño, e en outono, de setembro a novembro.
Un programa que busca seguir favorecendo o coñecemento da provincia entre a veciñanza, e consolidar un modelo de turismo de calidade, sostible, con capacidade para atraer visitantes ao longo do ano, que pon en valor o patrimonio e que mantén e crea emprego, sobre todo no rural.
Coñece a túa provincia inclúe, de balde, o transporte para os traslados de ida e volta dende o lugar ou lugares de orixe, póliza de seguros de viaxeiros, menú de xantar, e entradas e visitas a diferentes lugares de interese da provincia de Lugo. Estas visitas son realizadas por profesionais que contan coa habilitación de guía oficial de turismo de Galicia e polo persoal de atención ao público nos diferentes museos, empresas ou obradoiros sinalados nos itinerarios do programa.
