O voceiro nacionalista, Efrén Castro, comezou a súa intervención trasladando “o apoio e solidariedade” á veciñanza das zonas afectadas, aos equipos de extinción e a responsables municipais que tiveron que xestionar a situación para facer despois un chamamento á análise dos factores que contribuíron á evolución dos lumes.
Neste sentido, o deputado sinalou a falta de políticas de ordenación do territorio e a aproveitamento do monte e, no que ten que ver coa extinción, criticou que a Xunta de Galicia “derive nos concellos a responsabilidade de crear brigadas municipais que logo non poden poñer en marcha e que son moi difíciles de coordinar”. Fronte a esta organización dos equipos de extinción, o voceiro nacionalista avogou pola profesionalización e a estabilidade laboral destes servizos.
“O que queremos é que esta moción sirva como punto de partida para facer un pacto de país, ordenar o monte e regular e facer cumprir a normativa sobre onde se pode plantar e que especies. Con masas de especies pirófitas sen fin, non chegarán cantos medios teñamos para parar os lumes”, urxiu Efrén Castro.
A moción insta á Xunta a “por en marcha e axilizar o acompañamento e as axudas necesarias para que canto antes a veciñanza directamente afectada polos lumes poida recuperar as súas vivendas e propiedades e restablecer as súas vidas con certa normalidade; dar prioridade á colaboración institucional para unha pronta normalización da situación vital da veciñanza afectada; iniciar de xeito inmediato a recuperación, rehabilitación e reconstrución das zonas afectadas para evitar a súa degradación polo tempo e posibles factores climatolóxicos; e traballar todo o ano na limpeza, na ordenación e no aproveitamento integral do monte para acadar un rural vivo; acabando co abandono do territorio”.
No PP, Castiñeira explicou que “ten que abrirse un debate, pero non é o momento. É o momento de estar cos veciños e as persoas que quedaron sen as súas casas e os seus negocios”. Engadiu tamén que: “Hai que debater para afrontar este tipo de problemas en vindeiras ocasións. O tempo está cambiando. Non estabamos acostumados a estas olas de calor que acade vez veñen antes e son menos comúns. Hai que ter visión de futuro para poder atallar esta circunstancia”. Tamén explicou que “Galicia é a comunidade que máis inviste na loita contra os incendios: 180 millóns de euros dos que 33 se dirixen a prevención. Moi por enriba da segunda, Cataluña”.
Castiñeira puntualizou que o líder dos socialistas galegos, Valentín Formoso, tiña manifestado que “politizar os incendios é un erro” e explicou que “os incendios son un problema nacional e tamén internacional. Outros países que non sufrían olas de calor e incendios, súfrenos agora”.
Polo tanto, defendeu que “ten que haber un debate puro, sen demagoxia nin propagando sobre o motivo polo que a xente do rural se vai ás cidades. Hai que velar pola poboación, pero tamén polo territorio”. Así considera que “se debe debater a nivel autonómico e nacional; pero todas as administracións debemos facer unha discriminación positiva aos concellos pequenos. Neste sentido, a Deputación ten moito que mellorar”. Con todo, “quédome co talante de querer mellorar as cousas entre todos”, concluíu.
