Volve o Viñobús á Ribeira Sacra durante o periodo de vendima da man do Consorcio de Turismo Ribeira Sacra e no marco do convenio coa Axencia Turismo de Galicia para promoción do xeodestino.
Trátase dunha experiencia única onde maiores e pequenos aprenden de onde proceden as uvas, como se cultivan e a súa transformación en mosto ou en viño de forma natural.
A EXPERIENCIA DA VENDIMA
As saídas do ViñoBús serán os días 17, 18, 24 e 25 de setembro partindo do Parque dos Condes de Monforte ás 10:30 h. e con chegada de regreso ás 16:30 h. A actividade consistirá, unha vez se chegue ao destino co autobús, en dar un paseo guiado polos viñedos con persoas que coñecen a vide e como coidala, as variedades de uva e as súas diferentes follas, a importancia do chan… A continuación tamén se realizará unha cata de uvas, mostos e viños, percibindo os distintos aromas, sabores e texturas.
E como non podía ser doutro xeito nesta época do ano, os e as participantes desta orixinal excursión, vendimarán e pisarán os acios recollidos como se facía antigamente. A continuación introducirase o mosto obtido nas cubas para a fermentación e os enólogos ocuparanse de coidar este viño ata o seu embotellado. Aquelas persoas que o desexen, e pagando os gastos de envío, poderán meses despois gozar dese viño no que participaron como vendimadores solicitando o envío á casa das botellas que queiran.
Cómpre facer reserva previa da actividade a través da web do Consorcio de Turismo da Ribeira Sacra e a organización recomenda levar roupa e calzado axeitados para a ocasión. No prezo da actividade inclúese, ademais do desprazamento en bus e os/as guías acompañantes, o xantar dese día na adega.
