O alcalde de Sarria, Claudio Garrido, en nome da  Mancomunidade de Concellos Galegos do Camiño Francés, que preside, recolleu de mans da Xosé María García Palmeiro, presidente de APECSA, o X Premio Internacional de divulgación e promoción do Camiño, convocado pola Asociación de Periodistas e Estudosos do Camiño de Santiago.

A edición deste ano, estivo dedicada a Pilar Armesto Valiña, (Sarria 1955 – O Cebreiro 2021), hospitaleira, mesoneira, dinamizadora e defensora dos valores do Camiño de Santiago, pioneira no asociacionismo e na acollida aos peregrinos. No acto participaron, xunto co párroco do Cebreiro, Paco Castro, os familiares directos de Pilar Armesto Valiña e do que foi cura do cura do Cebreiro e promotor do Camiño, Alías valiña Sampedro.

O xurado que concedeu esta premio de APECSA, presidido polo xornalista, Luis Celeiro Álvarez, destacou e valorou moi positivamente o traballo da Mancomunidade e de cada un dos concellos integrantes da mesma, na defensa e promoción dos valores do Camiño de Santiago, que “dende os seus comezos foi un tránsito de cultura e coñecemento, un espazo de arte e de saber que “temos a obriga de manter e agrandar”.

Segundo o xurado, do que tamén formaban parte os xornalistas, Xosé Luis Muñoz e Carmen Prado, do Colexio de Xornalistas de Galicia e da Asociación de Periodistas de Santiago, respectivamente; Xabier Goyanes, da Asociación Pazos de Galicia, e Purificación Carballo, que actuou como secretaria, de APECSA, “o traballo feito pola Mancomunidade, no ano 2021 e primeiro semestre de 2022, na defensa e promoción de valores, como o da solidariedade, a divulgación da cultura en tódalas súas manifestacións, das artes e da artesanía, así como a consideración do camiño como un patrimonio común, capaz de xerar riqueza cultural e económica, en todos e cada un dos concellos, fan a esta entidade gañadora do Premio”. O Premio foi unha escultura, Harmonía, da autoría de Luis Loureira, e un diploma.