No caso de Láncara o convenio de colaboración entre a institución provincial ascende a 187.000€ para a humanización integral da rúa Benigno Quiroga da Pobra de San Xiao, unha das dúas arterias principais do municipio. “Esta é unha decisión moi importante para este Concello, pois evidénciase que responde a unha clara aposta polo rural do Presidente, que contribúe a fixar poboación e por poñer riba da mesa que en calquera Concello é posible desenvolver unha actividade económica se se cre niso”, subliñou o Deputado.
Este novo acordo súmase ao que, hai apenas un ano, a Deputación de Lugo fixo con este mesmo municipio para adquirir os terreos e os edificios ferroviarios que o Adif ten en desuso na Pobra de San Xiao cunha achega de 75.000€. Alí crearase un gran espazo público, cunha ampla zona verde de lecer que unirá co río, e a posta en valor dos edificios ferroviarios, como a antiga estación do tren, terá un impacto moi positivo para o concello a nivel urbanístico, social e económico.
Pola súa banda, tamén se lle deu o visto bo a un convenio de colaboración co Concello de Quiroga co obxectivo de ampliar o cemiterio municipal. Para este fin, a Deputación achegará 80.000€ en dúas anualidades.
Aprobouse tamén a licitación por 640.000€ para a mellora dun conxunto de estradas provinciais nos municipios de Baleira, Ribeira de Piquín, O Saviñao e Monterroso. No Saviñao, vanse mellorar dúas estradas provinciais, a LU-P-4102, que une Ferreira con Currelos cun investimento que supera os 120.000€. As obras afectarán ao treito que vai dende o punto quilométrico 10,9 ao 14,7. Os traballos terán un prazo de execución de 2 meses. Tamén no Saviñao arranxarase o firme da estrada provincial LU-P-5802, que vai dende Porto ata Córneas polo Casar. Nesta vía renovarase o treito que vai dende o punto quilométrico 6,4 ao 8,02 cun orzamento de licitación de máis de 74.000€. O prazo de execución é de 2 meses.
Captación de 240.000€ de novos fondos
Por outra banda, a Xunta de Goberno aprobou hoxe aceptar a concesión dunha subvención de 240.000€ que lle foi concedida á Deputación polo Ministerio para a Transición Ecolóxica e o Reto Demográfico para un novo proxecto que se desenvolverá nos vindeiros meses.
Será unha iniciativa con diferentes actividades integradas e solucións completas para abordar o problema de perda de poboación que está sufrindo o noso rural. Crearanse 3 oficinas de reto demográfico en diferentes concellos da provincia para ofrecer unha atención directa ao cidadán, haberá axudas para incentivar o arrendamento de vivendas no rural, se apostará por axudar a recuperar especies autóctonas para crear postos de traballo e riqueza no territorio e se porá en marcha un programa de becas e xornadas de especialización profesional, entre outras accións.
