O delegado territorial de Lugo, Javier Arias, e o alcalde, Carlos Armesto, comprobaron este xoves o resultado da actuación, que consistiu na construción dunha plataforma de madeira que engade unha altura de 5,10 metros sobre a estrutura orixinal. A nova construción, realizada en madeira laminada, favorece unha visión máis ampla e de maior calidade sobre o meandro do Miño, que é un dos elementos máis recoñecidos da zona. Ao seu carón, un panel informativo explica as rutas de sendeirismo, monumentos e outros puntos de interese que se poden visitar no concello.

O delegado territorial sinalou a importancia dos GDR no impulso de proxectos produtivos ou dinamizadores do territorio. Neste sentido, explicou que este miradoiro é un dos espazos que máis turismo atrae ao municipio.

En concreto, apuntou que os proxectos da medida Leader, cofinanciados cos fondos europeos Feader, teñen a vantaxe de estar pegados ás necesidades locais, porque son iniciativas que xorden dos concellos, entidades ou mesmo emprendedores e que se  seleccionan nese mesmo ámbito local mediante un amplo proceso participativo que involucra a axentes privados e públicos.