A Xunta puxo en funcionamento este mércores o laboratorio de análises clínicas e de bioquímica do Hospital de Monforte de Lemos, mentres que destacou que, nun espazo contiguo, levará a cabo unha nova área de laboratorio de microbioloxía “da que xa está encargado o proxecto para poder executar as obras neste mesmo ano”.

Segundo trasladou a Xunta nun comunicado, o conselleiro de Sanidade, Julio García Comesaña, explicou durante a inauguración que estas actuacións “son previas ao principal compromiso, que é a licitación, neste ano, do Plan Director que vai definir as actuacións para modernizar as áreas de hospitalización, consultas externas e os espazos administrativos“.

Así mesmo, Comesaña destacou que este hospital ofrece “cada vez máis servizos á cidadanía”. Deste xeito, destacou que a ampliación do hospital de día e a farmacia, leva a que este centro da rede do Sergas realice agora tratamentos de quimioterapia que antes tiñan que facerse en Lugo.

Nesta liña, a directora do distrito sanitario de Monforte, María Inmaculada Ramos, subliñou que esta remodelación proporciona “melloras na seguridade e condicións ambientais de traballo e a incorporación de novas tecnoloxías”. Así, lembrou que o pasado ano estes laboratorios procesaron máis de 82.000 peticións analíticas para pacientes.

OBXECTIVOS NOS HOSPITAIS COMARCAIS

Doutra banda, o titular de Sanidade resaltou que todos os hospitais comarcais “teñen en marcha procesos de ampliación e mellora”, xa que “grazas a eles, o 85 % da poboación galega atópase a menos de 30 minutos do seu hospital de referencia“.

Así, sobre a cobertura de profesionais, o conselleiro apuntou que, desde 2019, “o tempo de servizo nun hospital comarcal proporciona unha puntuación extra nos baremos das ofertas públicas de emprego”. Ademais, desde 2021, a prestación de servizos en hospitais como o de Monforte outorga puntos adicionais aos profesionais para obter un grao máis avanzado da carreira profesional.