Á demanda veciñal, os responsables municipais contestaron o pasado día 9 de xaneiro que están estudando as posibles solucións, “nun escrito no que no que se alude a conversas coa Consellería de Infraestruturas e mobilidade, das que non se aporta ningún outro dato tras seis meses da petición”, sinala Mercedes Martínez, presidenta da Asociación Silamouras, quen asegura tamén que, “Nas aldeas temos dereito a travesías seguras e amables, igual que nas cidades. En todo o concello da Teixeira non hai ningunha medida para calmar o tráfico. En lugares como Abeleda ou Boazo é perigoso pasear, especialmente para as persoas maiores e os nenos. Non queremos agardar a ver como detrás da pelota ven a freada e a traxedia.”

Despois de 18 anos con esta demanda reclámanse solucións, “A promoción da Ribeira Sacra ten que ter en conta o benestar da xente que vivimos aquí.” En agosto de 2004 solicitárase a instalación de bandas sonoras á Consellería de Política Territorial, Obras públicas e Vivenda, que informou dos problemas de ruídos das ditas bandas, sen chegar a denegar a solicitude. Pero segue sen haber alternativas, “o tráfico nesta travesía, a única recta nunha estrada lenta e con curvas, segue sendo moi perigoso especialmente pola gran afluencia de visitantes, infancia e persoas maiores que se dan cita na praza especialmente na tempada turística.”

“En 2022 o concello propuxo a creación dun parque infantil nesta mesma praza, sen contemplar a necesidade do calmado do tráfico.” A veciñanza considera que a conflitividade entre peóns e vehículos é recurrente e pregúntanse se serán necesarias vítimas por atropelo para que o concello tome medidas.

Os veciños da aldea de Boazo, no concello da Teixeira, tamén consideran necesaria a regulación do tráfico, polo que mantiveron conversas coa concelleira de Sanidade e Servizos Sociais, Ana Mª Prieto, quen asegurou que, dado que a “estrada é de titularidade municipal, as súas demandas serán atendidas sen dilación.”