Para levar a cabo esta proposta será necesaria a coordinación interprofesional entre o persoal sanitario dos centros de saúde e os Servizos Sociais Comunitarios do Concello, para definir a necesidade de acudir ás consultas médicas fóra do municipio e que esa persoa non conta coa capacidade económica suficiente para facer fronte ao gasto en desprazamento.

A rexedora, Lola Castro, recorda que o Concello de Folgoso do Courel adquiriu un vehículo todo terreo ao abeiro do Convenio interadministrativo entre a Deputación Provincial de Lugo e o Concello de Folgoso do Courel. “A finalidade última desta dotación é cubrir servizos sociais de primeira necesidade á poboación do Concello satisfacendo a necesidade de mobilidade de persoal do Concello para efectuar diferentes servizos e así prestar un servizo de calidade e deste xeito dar resposta ás necesidades da cidadanía”, sinala.

A alcaldesa explica que xa existe un Convenio de colaboración co Servizo Galego de Saúde para a realización de actuacións de mellora á cronicidade na asistencia sanitaria á veciñanza do municipio polo que o concelo por a disposición do persoal do SERGAS que desempeña a súa labor diaria nos centros de saúde do municipio un vehículo de titularidade municipal para a prestación do servizo de atención domiciliaria a persoas enfermas crónicas.

“Tense detectado que algún veciño ou veciña non acude ás consultas médicas de especialistas por non dispoñer de vehículo propio para realizar o desprazamento, non podendo asumir o custe do transporte privado por non dispor da capacidade económica necesaria. De aí a importancia desta proposta que se aprobará no Pleno de hoxe”, conclúe a alcaldesa.