O pasado día 23 de marzo, veciños de Parteme denunciaron na Garda Civil ao concello de Quiroga, despois de que o día 20 mandara unha cuba de formigón para verter na rúa principal da aldea. A asociación veciñal asegura que “a rúa atopábase en perfectas condicións. Con esa actuación subiuse o nivel do firme moitos centímetros ao non facer fresado para manter o nivel antigo, creando un problema a futuro na entrada de varias casas ao estar o nivel por encima das portas.”
A veciñanza lamenta que non se lles tivera comunicado a realización destas obras e quéixase de que durante 5 días valouse a única entrada á aldea quedando incomunicados os veciños, para o día a día a ante unha situación de emerxencia.
A asociación veciñal tamén denuncia non saber nada da partida do plan único que lles concedeu a Deputación de Lugo en 2022, “aínda non se executou na rúa que viña proxectado, rúa que se atopa en pésimas condicións. O mesmo coas partidas concedidas polo plan único desde o 2018 ata o 2022 para a limpeza dos camiños. As limpezas dos camiños facémolas os veciños pagándoo do noso peto. O mesmos cos saneamentos e as fosas sépticas que non existen”.
Nesta situación a asociación ten presentado ducias de escritos ante o concello de Quiroga e outras institucións sen ter ningún tipo de resposta por parte da administración local, administración competente nesta materia e pregúntanse “Que pasará cando a partir do 26 de xuño 2023 a Union Europea poida multar por non tratar as augas residuais e pluviais? Quen pagará esas multas? Onde está o diñeiro que vén de Europa para estas melloras?”.
“Levamos varios anos sendo ninguneados pola alcaldía, presentamos máis de 20 escritos e non contestaron nin ao primeiro ademais de non recibirnos, temos todo isto no valedor do Pobo cunha decena de reclamacións. Fan todo o contrario do que lles pedimos única e exclusivamente por levar a contraria ao pobo e amolar á Asociación de veciños. Así dise que o rural é futuro, prometen axudas ás asociacións de veciños e dinlles que son de vital importancia para o sistema, así é como se invisten os fondos Europeos no Rural e así é como nos menten unha e outra vez dicíndonos que gobernan para o pobo”, conclúe esta asociación veciñal.
