A Consellería de Promoción do Emprego e Igualdade apoiou o ano pasado na Zona Sur da provincia de Lugo nove iniciativas empresariais constituídas por mulleres a través do programa Emega de emprendemento feminino. As achegas suman 114.000 euros e chegan a cinco concellos da zona.

O delegado territorial da Xunta en Lugo, Javier Arias, explica que a convocatoria de 2022 axudou a crear ou consolidar 13 postos de traballo femininos nestes municipios, nove por conta propia e catro por conta allea. Do total, nove son de nova creación e catro son empregos que se manteñen.

Os proxectos na Zona Sur abranguen ámbitos moi diversos, como atención a persoas dependentes, comercio -dúas librerías, unha zapatería e unha florería -, un centro de estética, dous aloxamentos turísticos e un negocio de formación no eido turístico, entre outros.

Programa Emega

O programa Emega comprende incentivos para favorecer a posta en marcha, a mellora e a activación de iniciativas empresariais constituídas por mulleres. Tamén medidas complementarias para facilitar a conciliación da vida persoal, familiar e laboral, así como o acceso a servizos específicos de información, asesoramento e orientación empresarial co obxecto de facilitar a implantación e consolidación dos proxectos.

Está formado por catro liñas: Emprende, con incentivos para a posta en marcha de novas empresas por parte de mulleres desempregadas e a creación de emprego estable por conta propia e allea; Activa, para favorecer a reactivación e consolidación de proxectos empresariais; ITEF, que pon o foco no apoio a iniciativas empresariais con carácter innovador, con contido científico ou de base tecnolóxica; e a liña Concilia, complementaria das tres anteriores, para axudar tanto ás mulleres promotoras como as traballadoras ao seu cargo na súa conciliación.