O delegado territorial de Lugo, Javier Arias, mantivo unha xuntanza coa presidenta da agrupación empresarial, Tamara Castro, e o alcalde de Taboada, Ramiro Moure, para abordar as accións previstas coa colaboración da Administración autonómica.

Os organizadores buscan divulgar a cultura do viño prestando especial atención ás xentes que viviron en primeira persoa o proceso de transformación da Ribeira Sacra. O programa vai dirixido a todo tipo de públicos e incluirá actividades divulgativas, culturais e lúdicas -roteiros para dar a coñecer o territorio, proxección de material audiovisual, montaxe dunha sala expositiva, encontros, catas informais ou faladoiros nos que terán moito protagonismo as mulleres -.

Haberá así mesmo accións específicas que permitirán afondar en aspectos máis técnicos do sector, dirixidas a profesionais ou a persoas con interese en ampliar os seus coñecementos neste eido. Arias puxo en valor o potencial do sector do viño para “dinamizar o territorio e xerar riqueza” e apuntou que “actividades como esta contribúen a divulgar os valores excepcionais da Ribeira Sacra”.