A Asociación Sociocultural Boca do Monte, dos Anguieiros en Quiroga, participou este mércores 5 de abril no programa de viaxes Coñece a túa provincia organizado pola Deputación de Lugo.
Socios e socias da entidade visitaron e coñeceron o Pazo de San Marcos, con recibimento do deputado provincial Pablo Rivera Capón, achegáronse posteriormente aos concellos de Pedrafita do Cebreiro e Triacastela.
Un total de 16 persoas formaron parte do grupo que, ademais de coñecer interioridades da sede da Deputación de Lugo como o salón de actos ou o salón de plenos, achegáronse á aldea do Cebreiro onde visitaron a Palloza Museo e o Santuario. Antes de xantar en Pedrafita tiveron tempo para camiñar uns 2 quilómetros do Camiño de Santiago chegando ao punto onde comeza xa a provincia de León.
Xa pola tarde, visitaron a Igrexa de Santiago de Triacasela e deron unha volta polas rúas desta localidade por onde pasa tamén o itinerario xacobeo.
Na xornada estiveron acompañados dunha Guía Oficial de Galicia que, tanto nos traxectos do autocar como nas paradas que se fixeron, foi achegando coñecementos sobre a ruta realizada pero tamén sobre patrimonio e tesouros que ten a provincia de Lugo no seu conxunto.
Esta edición de Coñecendo a túa provincia conta con dúas quendas, a primeira arrancou en marzo e continuará ata xuño, e a segunda será no outono.
