O alcalde de Sarria, Claudio Garrido, informou este venres 14 de abril que o comezo dos traballos de demolición da estrutura do edificio de sete plantas e 48 vivendas situado na rúa Calexa obrigará a activar desde o vindeiro luns un plan de tráfico que cortará a circulación de vehículos nesa rúa. O tramo afectado será o que vai dende o cruce coa rúa Frei Luis de Granada ata o cruce coa rúa Padre Sarmiento.
Segundo explicou o rexedor, a Policía Local instalará paneis informativos advertindo do corte da rúa Calexa e aos veciños residentes nesa zona permitiráselles o acceso aos garaxes. Claudio Garrido tamén avanzou que esta limitación da circulación prolongarase durante aproximadamente mes e medio “por razóns de seguridade mentres se desenvolven os traballos de demolición”.
“Pedimos desculpas anticipadamente polas molestias que se poidan ocasionar, pero esta demolición para a que a Xunta de Goberno Local concedeu licenza no mes de marzo é necesaria e simbólica porque eliminará un dos grandes impactos visuais urbanísticos sobre o Camiño Francés ao paso por Sarria”, manifestou o alcalde.
