Manuel Villanueva de Castro, Director Xeral de Contidos de Mediaset, recibiu na mañá deste 3 de xuño a Insignia de Ouro do Concello de Quiroga con pergamiño acreditativo.
O Alcalde de Quiroga en funcións, Julio Álvarez, fíxolle entrega deste recoñecemento tras a sinatura de Villanueva no libro de ouro do Concello. O homenaxeado tivo palabras de agradecemento para Quiroga e os quirogueses: “Quiroga e vós formades parte do meu mapa sentimental e non faltei nunca á nosa cita anual, da que non houbo nin haberá pandemia que o impida. En poucos sitios me sinto tan agusto como nesta terra de vontade. Levarei esta ilustre distinción que me concede a corporación municipal, con orgullo e con honra. Alá por onde vaia direi que este é o símbolo dunha poboación xenerosa e hospitalaria, merecedora de tódalas cousas boas”.
Julio Álvarez agradeceu a Villanueva todo o que sempre fixo por Quiroga. En palabras do rexedor municipal en funcións: “É unha mínima expresión do que sempre fixeches por Quiroga, con ese interese polo evento máis importante que ten Quiroga, a Feira do Viño, tanto cos pregoeiros como coa proxección que se fai desde todas as canles de Mediaset”.
