Aberto o prazo de inscrición para a 23ª edición de Artelemos

O prazo para presentar inscricións na tradicional mostra de artesanía que organiza o Concello de Monforte en agosto rematará o 27 deste mes de xuño. Como novidade, este 2023 o evento alongarase un día máis.

Artelemos 2022 / Concello de Monforte

O Concello de Monforte abriu o mércores 7 de xuño o prazo de inscrición para participar na 23ª edición da Mostra Artelemos, prazo que permanecerá aberto ata o día 27 para que os artesáns e artesás poidan cursar as súas solicitudes.

Este ano 2023 o Concello engade un día mais de celebración da mostra, que permanecerá aberta durante seis días consecutivos nas primeiras datas de agosto, concretamente dende o día 4 ata o 9, na rúa Cardenal, como ben sendo habitual.

O Alcalde, José Tomé Roca, referíndose á mostra comentou que “poderemos atopar gran variedade de disciplinas artesanais. Participarán na mesma un número total de 30 artesán/áns podendo ofrecer unha variada gama de produtos que van dende orfebrería, cestería, coiro, lá, cerámica, olería de Gundivós… ademais os visitantes que se acheguen a desfrutar desta nova edición de Artelemos, poderán ver en vivo a elaboración de pezas que os propios artesáns realizarán asi como a participación de obradoiros para nenos/as”.

O horario durante os seis días da Mostra Artelemos será de 10:00 a 14:00 e 18:00 a 22:00 horas e poderán participar aqueles/as artesás/áns coa carta de artesanía emitida, e/ou taller dado de alta como artesán/á, tendo estes últimos prioridade, así como aqueles de Monforte e a comarca Terra de Lemos, e inscritos no Rexistro Xeral de Artesanía de Galicia.

Dende o concello animan a participar en Artelemos tendo en conta o escaparate que supón amosar as creacións artesanais na capital da Ribeira Sacra e no mes de agosto, principal mes de afluencia de visitantes e turistas.

DEIXAR UN COMENTARIO

Please enter your comment!
Please enter your name here