Arredor dun cento de persoas, entre docentes e representantes de firmas empresariais e de centros educativos, reuníronse para analizar as necesidades do tecido produtivo da zona e deseñar unha oferta de ciclos e másteres de FP para os vindeiros cursos que permita darlle resposta ás demandas das empresas e, deste xeito, mellorar a empregabilidade dos titulados.

Son case 700 as persoas matriculadas nos 32 ciclos e un máster de FP ofertados polos seis centros que imparten esta ensinanzas nos concellos de Monforte de Lemos, Chantada e Sober. O interese nestas ensinanzas, segundo os datos rexistrados, medrou en máis dun 22,5% na última década.

Ademais do alumnado e do profesorado dos centros e institutos da comarca que imparten ensinanzas de FP, tamén interviñeron representantes de institucións e empresas da zona como o grupo HOTUSA Industrias Losal, Galega de Software Especializado ou o Consorcio de Turismo Ribeira Sacra

Xunto coa subdirectora xeral de Innovación Profesional e Coordinación co Sistema Produtivo, Cristina Lesta, interveu na apertura do encontro o presidente da Fundación CEL, Luis García Santalla. A continuación, a xornada continuou co relatorio A Formación Profesional como vía de capacitación, a cargo do xefe de servizo de Relación co Sistema Produtivo, Orientación e Inserción Laboral, Jorge Regueiro.

Na mesa redonda abordáronse as necesidades do sector produtivo e da resposta que se lles dá a través da FP Dual e da importancia da acreditación de competencias dos traballadores. Nela participan tanto representantes de centros educativos como de empresas. A xornada culminou co desenvolvemento dun espazo networking, para que os asistentes poidan tecer novas redes profesionais.

O obxectivo do Plan Conecta FP é formar profesionais cualificados que dean maior e mellor resposta ás necesidades das empresas e favorezan a súa competitividade, así como a confianza da industria na FP. Isto redundará, ademais, nunha maior empregabilidade da poboación nova.

Plan Conecta FP Galicia / IES A Pinguela