O CCU de Monforte celebra a chegada do verán con tres actividades que xa case son unha tradición en Monforte: a tirolina, o rocódromo e os Karts a pedais. Ambas atraccións estarán dispoñibles do 23 ao 27 de xuño para o goce daqueles que teñan entradas conseguidas a partir de compras nos establecementos asociados.
ROCÓDROMO
Nesta actividade poderase facer escalada e gozar das espectaculares vistas da Praza da Compañía desde o máis alto do rocódromo. A actividade é apta para nenos e adultos.
KARTS A PEDAIS
Para os amantes da condución, esta actividade dos divertidos Karts a pedais é unha opción moi interesante e máis tendo en conta o lugar onde se desenvolve, na explanada da Compañía. Está indicada para nenos e adultos. Os máis pequenos terán a posibilidade de ir acompañados dun adulto nalgún dos Karts que hai con praza dobre.
TIROLINA DOBRE
“Gustaríache saber que sente o teu corpo suspendido a varios metros de altura?”, preguntan os organizadores das actividades do CCU. Para comprobalo, o mellor xeito e acadar entradas para poder subir á atractiva Tirolina Dobre que se instalará na Praza do Campo da Compañía. Actividade apta para adultos e nenos a partir de 4 anos.
COMO CONSEGUIR ENTRADAS?
Sendo unha actividade organizada polo comercio asociado de Monforte, e coa finalidade de premiar aos seus clientes e dinamizar o comercio local, as entradas só se poden conseguir facendo unha compra mínima de 10€ nalgún dos 160 establecementos asociados ao Centro Comercial Urbano de Monforte. Cada entrada dá acceso a escoller de balde unha das actividades: Tirolina, Rocódromo ou Karts a pedais.
Dende o CCU avisan tamén que nas súas redes sociais —@ccumonforte en Instagram, Facebook e Twitter– poden sortear algunhas entradas estes días.
HORARIO E FINANCIACIÓN
Tanto os Karts a pedais, como a Tirolina dobre e o Rocódromo, estarán abertos ao público no seguinte horario: Mañás de 10.00h. a 13.00h. e tardes/noites de 19.00h. a 24.00h. O financiamento corre a cargo da REDIC –Rede de dinamización comercial da Xunta de Galicia– e colabora o Concello de Monforte.
