Rubén Alejandro Lucas García foi tamén o gañador do concurso de carteis das Festas Patronais de 2021, que por mor da Covid-19, só tiveron a conmemoración do Día da Patroa e os Fogos de San Vicente.

O concurso para elexir cartel anunciador das Patronais chegou este ano á súa vixésimo oitava edición, despois de retomarse no 2015. Establécese todos os anos un premio de 1.000 euros para o cartel gañador. Ó concurso deste ano presentáronse 15 traballos artísticos, un número moi similar ó de pasadas edicións. A maioría deles foron elaborados por veciños e veciñas de Monforte; en concreto foron 9 os traballos a cargo de artistas monfortinos. Tamén chegaron propostas doutras localidades galegas, en concreto, dende Escairón, Castro Caldelas ou A Coruña.

Todos os carteis que se presentaron a concurso, as 15 obras, serán expostos do 7 ó 24 de agosto na Casa da Cultura de Monforte. Unha vez remate dita exposición, os autores non premiados poderán retirar os seus carteis se así o desexan.

Elección do cartel gañador

O xurado, estivo composto por sete persoas de ámbitos sociais, educativos e culturais monfortinos diferentes, así como a Concelleira de Cultura, Marina Doutón. O xurado decidiu o gañador  tras cinco rondas de clasificación, que levaron a tres finalistas que se disputaron o premio final.

A elección do cartel que o xurado considerou como gañador, en verbas do Alcalde “é unha explosión de alegría e cor, moi necesaria tras a pandemia. O cartel aúna a tradición da festa cos elementos icónicos da nosa cidade, integrados todos eles a través dos xogos de cores. Polo tanto, configúrase coma un cartel cheo de dinamismo e cor, que evoca a vitalidade das nosas festas”.