O concello de Bóveda celebrou reunión informativa cos propietarios para avanzar no polígono agroforestal de Ver. O alcalde, José Manuel Arias, valora a boa acollida que tivo o encontro, no que participaron numerosas persoas interesados na adhesión a este proxecto agrario que impulsan, ademais do Concello de Bóveda, a Xunta de Galicia a través do AGADER e a empresa Proyestegal.
Na fase actual é preciso entregar documentación para adherirse a través dunha recollida de compromisos das persoas titulares das parcelas.
Os días nos que poden facelo en horario de 09:00 a 15:00 horas e de 16:00 a 18:00 hora son:
- Martes 18 de xullo
- Xoves 20 de xullo
- Mércores 26 de xullo
- Xoves 27 de xullo
O Goberno local agarda que con esta nova fase do proxecto se adhiran o maior número posible de propietarios e, ao mesmo tempo, poder identificar aquelas parcelas que aínda se atopan a nome de descoñecidos e que representan un 20% do terreo.
Unha vez remate o período de adhesión o proxecto entrará en novas fases, cun período de alegacións e a posibilidade de agrupar terras, comprar ou arrendar as fincas. “O importante nesta fase é chegar a ese 70% de superficie para conseguir a viabilidade do polígono agrario”, precisa o rexedor, José Manuel Arias.
