Artesanía de Galicia volverá estar presente na Ribeira Sacra por terceiro ano consecutivo, será o vindeiro sábado 19 de agosto no fermoso enclave do Santuario de Cadeiras, no Concello de Sober.
Trátase dun encontro de artesáns, no que hai anotados 19 expositores, dará comezo ás 11:00 horas e desenvolverase ata as 21:00 horas. Para as 13:00 h. está programado un concerto do coñecido grupo De Vacas.
Ademais da posibilidade de poder visitar os stands dos artesáns presentes na mostra, haberá os seguintes obradoiros gratuítos para toda a familia en horarios de mañá (de 11:00 a 14:00 h.), e de tarde (de 16:00 a 21:00 h.):
Tecido colectivo. Impartido por María José Martínez e José Antonio Carrera, de Peixesapo. Consistirá na elaboración colectiva de tapices textiles para aprender a técnica básica de creación dun tecido en alto lizo.
Iniciación ao torno cerámico. Impartido pola Asociación Galega de Cerámica e outras Artesanías A Escola. Aquí os participantes elaborarán pezas de barro con técnicas da olería tradicional galega.
Técnicas de cestería. A cargo de Carlos Rubio de ‘O caracol Ecocestos’. As persoas que asistan a este obradoiro coñecerán as técnicas que emprega este artesán para elaborar pezas tan tradicionais como as piteiras. Os máis cativos poderán reproducir imaxes como peixiños e outras dándolle forma co vimbio.
ARTESÁNS PRESENTES NA MOSTRA
Neste segundo encontro de artesáns, no fermoso santuario da Nosa Señora de Cadeiras de Sober, dezaoito creadores e as creadoras amosarán os seus mellores traballos: Armaior (madeira de Oliveira), Arobe Cerámica, Bangus, Blaurtopías, Ceniza de papel, Elías de Gundivós, Enxógate, Figulus olaría tradicional de Gundivós, Lumecú, María Alba, Mimacuir, Mocao Artesanía, Nobelo a Nobelo, Noga arts joyería de autora, Obradoiro Gorín, Olería de Batán, Riomao Estudio Creativo, Senda Coiro e Siliva.
