O proxecto suporá a ampliación en 164.846 m2 da superficie actual do Polígono do Reboredo, case 16,5 ha., “o que supón un incremento do 44,50% da superficie do actual, é dicir, case aumenta a metade, dado que o actual ten unha superficie aproximada de 370.600 m2” sinalou o Alcalde. A ampliación levarase a cabo pola parte noreste, incluíndo algunha parcela máis que se adquirirá neste procedemento para completar a superficie urbanizable sinalada de 164.846 m2. O alcalde explicou que desde o 2015 vendéronse tódalas parcelas, cunha proxección de que a medio prazo, o polígono existente terá todas as parcelas edificadas dentro da edificabilidade permitida legalmente.
Deste xeito, o “éxito de promoción e venta das parcelas existentes, levou ó Concello a solicitar á Deputación Provincial de Lugo a cesión das parcelas que comprara no seu día para que se implantase Pacadar, e que o Concello non permitiu a través dun informe do anterior Alcalde, dicindo que non se podían depurar as augas residuais desa empresa, e por iso non se puido instalar”.
A Deputación de Lugo atendeu a solicitude do Concello e cedeu gratuitamente eses terreos para destinalos a fins industriais, e o concello convocou o concurso para a “Redacción da Modificación das Normas Subsidiarias de Planeamento e do Plan Parcial do Polígono Industrial do Reboredo”, co obxecto de comezar a dar os pasos necesarios para a súa ampliación. “Oficina de Planeamento, S.A.” foi a empresa adxudicataria por un importe de 204.490 €, sendo asinado o contrato, o día 13 de decembro de 2022.
Con data 31 de xullo do presente ano, a empresa, enviou por sede electrónica o borrador do Plan coa Memoria Xustificativa e Documento Ambiental Estratéxico, que recollen a situación de partida e a proposta de futuro, incluíndo as modificacións que houbo no polígono actual, pero que non están reflexadas documentalmente.
O 14 de agosto, o Concello aprobou o borrador do proxecto de Modificación das Normas Subsidiarias de Planeamento e do Plan Parcial do Polígono, que enviou á Dirección Xeral de Calidade Ambiental, Sostenibilidade e Cambio Climático, que recaba outros informes sectoriais (por exemplo, a Confederación Hidrográfica do Miño-Sil) que sexan necesarios, dado que implica un cambio normativo de 16,48 has., equivalente ó 0,08% da superficie do termo municipal.
Neste aspecto, o Alcalde aclarou que “dado que o regato do Carballo ten moita zona de Policía de Cauce, de 100 metros, limita o crecemento do Polígono cara a ese lado, polo que planteamos unha reorganización xeral das zonas verdes, que permita unha correcta utilización de solo industrial e ó mesmo tempo superamos as esixencias de zonas verdes, facendo unha zona ampla de esparcemento entre as traseiras da nova rúa e o cauce do Carballo. O borrador contempla tamén a posible permuta de ubicación de zona verde por ampliación de zona industrial e tamén varía a posibilidade de superficie para usos deportivos e novos viais para conectar o actual polígono coa posible ampliación cara o suroeste, “que temos solicitado que sexa acometida polo SEPES (SEA), o que lle permitiría comunicarse por tres lugares diferentes co obxecto de ter un Polígono industrial ben intercomunicado”.
O concello ten anunciado ademáis un investimento de preto de 5.000.000 € para unha nova depuradora no Polígono. “O éxito do polígono tradúcese no interese crecente de empresas por implantarse nel, como a farmacéutica KernPharma, que construirá unha planta de produtos inxectables, cun investimento de máis de 60M€ e con máis de 100 empregos, ou a ampliación e mellora das instalacións da empresa de produtos lácteos Oviganic Ibérica, e novos proxectos industriais que están en fase de anteproxecto.”
