Un ex traballador dunha axencia de viaxes de Sarria foi condenado este xoves na Audiencia Provincial, en base a un acordo de conformidade, a unha pena de dous anos de prisión por ofertar paquetes vacacionais falsos e cobrar anticipos das reservas a 37 persoas, entre os anos 2019 e 2020.

De acordo ao recolleito no relato do Ministerio Fiscal, o condenado, un mozo de 29 anos que recoñeceu os feitos que se lle imputaban,publicitaba ‘ofertas lóstrego’ a un prezo inferior ao de mercado e facilitaba a súa conta bancaria para pechar reservas con clientes da axencia sen o coñecemento da súa empresa. Ao decatarse as persoas afectadas de que ditas reservas non existían, o condenado procedía á devolución dos depósitos esixindo a cambio aos clientes asinar un documento co compromiso de non emprender accións legais na súa contra.

Por tales feitos, a Fiscalía pedía inicialmente unha pena de prisión de tres anos e tres meses por un delito continuado de apropiación indebida. A acusación particular, pola súa banda, actuando en nome da propietaria da axencia, solicitaba seis anos de cárcere e máis de 93.000 euros de multa en concepto de responsabilidade civil polos danos e prexuízos xerados.

ACORDO

Na vista oral celebrada este xoves na Audiencia Provincial de Lugo, a atenuante de reparación do dano (o acusado xa devolvera o diñeiro ás vítimas antes da celebración do xuízo) foi considerado como “moi cualificado” e tanto Ministerio Fiscal como acusación particular acordaron rebaixar a pena de prisión a dous anos. O acordo de conformidade alcanzado obriga, con todo, ao ex traballador ao pago dunha indemnización de 25.000 euros (dos cales xa abonou 15.000) á súa antiga axencia nun prazo de dous anos.