Aproveitando a ponte de decembro, a xerencia do quirogués Ruxe-Ruxe organiza un concerto para ambientar o local e pasar unha noite de festa gozando de boa música grazas a La Mosca Valiente, unha formación que está a sorprender dende hai uns anos polo seu xeito de interpretar e combinar estilos musicais.

Que caracteriza a este duo pontevedrés? O que máis é que leva ao límite o formato acústico. Dous grandes músicos, Marcos e Rodrigo, fan vibrar ao público e sorprenden cunha proposta orixinal, moi tola e fóra do común. Un espectáculo difícil, por non dicir imposible, de atopar en grupos de versións a nivel de Galicia. Cun repertorio ecléctico, e no que abranguen cancións de onte, hoxe e sempre, La Mosca Valiente promete festa rachada.

Aseguran non ser capaces de etiquetarse e din: “Chamámolo ‘wrestling music’ porque nun concerto podemos chegar a tocar temas de 8 ou 9 estilos diferentes”.

O concerto no Ruxe-Ruxe será o venres 8 de decembro ás 23:30 h.