En Monforte ubícase na explanada da Compañía desde este xoves ata o 17 de decembro, en horario de 9:00 a 14:00 e de 16:00 a 19:00 h, con entrada gratuíta e para todos os públicos. En colaboración co Concello de Monforte, pecháronse visitas cos diferentes centros educativos da cidade.

A través desta iniciativa, INCIBE quere elevar os niveis necesarios de cultura en ciberseguridade que calquera usuario debe posuír para desenvolverse con confianza e seguridade na era dixital. Estímase que durante 3 anos, a experiencia do roadshow concienciará en ciberseguridade a preto de 300.000 persoas en toda España.

O roadshow, unha vez despregado, é un espazo versátil, multifuncional e completamente accesible, que dispón de dúas grandes zonas, unha área interior e unha exterior, con diversas actividades de concienciación, formación e lúdicas, para que todos os participantes poidan divertirse á vez que aprenden a navegar de forma segura pola Rede.

O espazo interior, capaz de acoller a 30 persoas, contará cunha área de gamificación para xogos en liña; zona expositiva de charlas e contidos didácticos; e un escape room, onde superar riscos dixitais e desenvolver accións para evitar e xestionar ameazas.

Á súa vez, no espazo exterior, con capacidade para 36 persoas, habilitarase unha zona de xogos e unha cabina para poder contactar co 017, o servizo  ‘Tu Ayuda en Ciberseguridad’  de INCIBE. Este formato permite manter a equidade no acceso á información e a capacitación a calquera nicho de poboación, achegando os contidos, medios e recursos a calquera colectivo, en calquera localización, en igualdade de condicións.

Do acto inaugural en Monforte participaron a Tenente de Alcalde, Gloria Prada, a experta de Ciberseguridade para Cidadanía e Menores do INCIBE, Cristina Gutiérrez e a Subdelegada do Goberno en Lugo, Isabel Rodríguez.