Moncho Díaz, natural de Vilanova (Monforte) e compoñente que foi do mítico grupo tradicional Fuxan Os Ventos, recibiu unha pequena homenaxe co gallo do primeiro aniversario do seu pasamento (17 de febreiro de 2023).

A familia, amigos e amigas de Moncho Díaz –algúns da infancia–, reuníronse no local da Sociedade La Fraternal, do barrio da estación de Monforte, para lembrar a súa figura coincidindo co cabo de ano do seu falecemento.

O acto, que consistiu en comer empanada acompañada de viño da Ribeira Sacra, contou tamén con coñecida xente da cultura galega como Uxía Senlle que, xunto con outros artistas, interpretaron un pequeno repertorio musical. “Cantamos moitas das cancións que lle gustaban a el ou que cantaba como ‘Menina estás á janela’, ‘o Carro’, ‘Yolanda’…”, comenta Noa Díaz, unha das súas fillas.