Un total de seis institutos e centros integrados de FP de Galicia veñen de ser premiados no concurso Eduemprende Idea 2023, un certame impulsado pola Consellería de Cultura, Educación, FP e Universidade e a Consellería de Promoción do Emprego e Igualdade co obxectivo de incentivar a realización de proxectos empresariais entre o alumnado das ensinanzas de FP, deportivas ou de artes plásticas e deseño.
As persoas participantes debían presentar ideas de negocio orixinais que puideran dar lugar ao desenvolvemento de novas empresas, promovendo, deste xeito, a cultura emprendedora entre o alumnado. Os seis proxectos premiados, tres na modalidade de ciclos de grao medio e tres na modalidade de ciclos de grao superior, recibirán os seguintes premios en metálico: 3.000 € para o 1º premio, 2.000 € para o 2º e 1.000 € para o 3º.
Ademais do premio económico os gañadores poderán incorporarse a un viveiro de empresa da Consellería de Educación e recibir asesoramento técnico a través da Rede de polos de emprendemento e apoio ao emprego.
IES A PINGUELA, CENTRO PREMIADO
O IES A Pinguela foi o único centro da provincia de Lugo premiado neste certame, concretamente na modalidade B, de Ciclos de Grao Medio.
O centro de ensino monfortino levou o 2º premio, dotado de 2.000 euros, grazas ao seu StyleClo, unha aplicación móbil de moda que permite aos usuarios crear combinacións de roupa de maneira rápida e sinxela, con suxestións personalizadas baseadas no clima, a ocasión e as preferencias individuais.
