Este ano dende a organización do “Estase cocendo”,  homenaxéase á historia do ferrocarril, que tan significativo foi na cidade do Cabe, co obxectivo de resaltar a súa importancia e de recuperar o prestixio que tivo no pasado. A tenente de alcalde do concello de Monforte, Gloria Prada, considera un acerto a homenaxe deste ano porque “todas as persoas que traballaron e traballan a prol do ferrocarril na nosa cidade merecen con creces esta homenaxe e recoñecemento, e por suposto as persoas que  hoxe están aquí presentes”.

Desde a delegación sur da APEHL decidiuse que este ano foran 4 os compadres do “Estase Cocendo”, relacionados co ferrocarril, en concreto, Germán López, xubilado ferroviario, Luis Blanco, Director do Museo do Ferrocarril de Galicia, Jesús Francisco Vila, Profesor do Colexio Ferroviario, e Javier Pérez, recentemente nomeado Director Xeral de Renfe Viaxeiros, cargo que compatibiliza coa Dirección da área de negocio de Alta Velocidade e Servicios Comerciais.

Na súa intervención, Gloria Prada lembrou “550 M€ para  modernizar a vía Ourense-Monforte-Lugo, 7M€ para a supresión dos pasos a nivel de Rioseco e Juan Montes, e a mellora da Estación do tren e da súa praza por case 4M€, ou o novo Centro de Competencias Dixitais e de Ciberseguridadede Renfe, que foi inaugurado en Monforte en 2023, cun investimento dun millón de euros. Obras que sen dúbida contribuirán a recuperar a importancia e relevancia que o ferrocarril ten na nosa cidade.”

A Tenente de Alcalde rematou a súa intervención convidando a todo o mundo a participar desta campaña gastroturística do Estase Cocendo 2024, e a que durante este mes de marzo, se acheguen aos diferentes establecementos da zona, para degustar o prato protagonista que é o Cocido.