O Concello de San Xoán de Río organiza unha nova ‘Xornada de Convivencia Feminista’ tras o éxito do pasado ano coa presenza de Pili Pampín. A actividade realizarase o vindeiro 4 de maio e a convidada para esta ocasión é a cantante so Incio Lucía Pérez.
O programa para ese día comezará cun recibimento moi especial, unha coreografía de benvida a cargo dun grupo de mulleres de San Xoán de Río ás 12:00 h.
A continuación, ás 12:30 h., Lucía Pérez ofrecerá unha charla na que se abordarán detalles da súa vivencia en perspectiva feminina: como viviu de nova o feminismo, como foi o seu camiño profesional ata a actualidade, como chegaron os éxitos, cal é seu punto de vista sobre a situación actual da muller… “Unha charla que non pretende ser só unidireccional, se non que está encamiñada a un coloquio no que intervirá o público con preguntas e/ou contando as súas propias experiencias”, explica o Alcalde Xosé Miguel Pérez Blecua. “O ano pasado funcionou moi ben con Pili Pampín, contounos moitas cousas interesantes da súa vida e a interacción coas veciñas foi inmellorable”, engade tamén Elena Enríquez, concelleira de Igualdade.
Rematado este encontro previo coa convidada haberá un xantar no que se compartirá mesa con ela, xantar para o que cómpre anotarse previamente. O Concello de San Xoán de Río prega inscribirse antes do 30 de abril pasando polo concello ou chamando ao teléfono 988 346002.
Despois da comida, sobre as 16:00 h. amenizará a sesión de tarde a disco móbil DJ Rafa, de Radio Monforte. Música escollida para rematar a xornada como nos bailes de antes e quen sabe se incluso se animará Lucía Pérez a cantar algún hit do seu repertorio…
A iniciativa desta actividade de convivencia feminista parte do Concello de San Xoán de Río e colaboran no desenvolvemento da mesma o Centro de Información á Muller da Pobra de Trives e o Pacto de Estado Contra a Violencia de Xénero.
SOBRE LUCÍA PÉREZ
Lucía Pérez comezou o seu camiño na música despois de gañar o certame “Canteira de Cantareiros” da TVG no ano 2002.
O seu primeiro disco foi “Amores y Amores” (2003), co cal obtivo o prestixioso disco de ouro galego, e no 2006 aventurouse no escenario internacional participando no Festival de Viña del Mar en Chile, onde deixou pegada tras quedar segunda no concurso coa interpretación da canción “What would I do with you”. Nese ano presentou o traballo “El tiempo dirá”, e anos despois “Volar por los Tejados”, editado simultanemente en España e Chile no 2009.
No 2010 Lucía sacou ao mercado “Dígocho en Galego” e un ano despois chegaría un dos momentos que marcaría a súa traxectoria musical. Foi elixida para representar a España no Festival de Eurovisión coa canción “Que me quiten lo bailao”. Sería a primeira galega en participar neste prestixioso evento musical.
No 2011 asinou coa Warner Music, comezando deste xeito unha nova etapa na súa carreira, e publicou un novo traballo discográfico, “Cruzo los dedos”. Os seus seguintes traballos discográficos serían “Quita penas” (2014) e “Quince soles” (2018). Como sinxelos salientar “Na miña pel” (2021) e tres temas sacados no 2023: “La Penúltima”, “La Salida” e “Guerrera”.
Máis aló da música, a artista galega foi gañando presenza no ámbito televisivo participando moito na Televisión de Galicia. No 2012 foi presentadora do programa “Heicho Cantar, Queridiña” e dende ese momento vén compaxinando a súa carreira musical con aparicións noutros programas da canle autonómica.
