Esta feira gastronómica, a única da provincia nesta categoría contou esta fin de semana con sete produtores de aceite: Ouro de Quiroga, Jesús Bao Mondelo, Aceiroga, Jesús Arias Rodríguez, Pedro Soto Losada, Val de Quiroga e Cento x Cento. Participaron tamén varios artesáns locais de diferentes especialidades.
Durante a mañá celebrouse unha degustación comentada de aceites na capela das Farrapas, situada xunto ao recinto da feira, actividade que espertou notable interese entre o público. Entre as autoridades que visitaron a mostra, acompañados/as polo equipo de Goberno do Concello de Quiroga, estiveron o responsable de Promoción Económica e Social da Deputación, Pablo Rivera Capón, e o presidente da Confederación Hidrográfica do Miño-Sil, José Antonio Quiroga.
A cita, declarada Festa de Interese Turístico de Galicia, ademais da demostración da elaboración artesanal do aceite no Muíño das Farrapas, contou con postos de produtos típicos da zona e actuacións dos grupos tradicionais O Recanto e Merenzao. A organización estuda ampliar a duración da feira e outros cambios para vindeiras edicións.
A Deputación De Lugo, así como a Xunta, colaboran na organización do festexo gastronómico co Concello de Quiroga.
