A xornada terá lugar na Casa da Cultura e, se o tempo o permite, na explanada da Praza de España. De 11:30 a 13:30 e de 16:00 a 18:00, a cidadanía poderá achegarse aos diferentes postos habilitados pola entidade nos que exporán os traballos elaborados artesanalmente polas persoas usuarias de AGORA. Entre os proxectos que se amosarán destacan os realizados en talleres de mosaico, costura e cociña, entre outros.

Unha das actividades principais será o trazado dun circuíto inclusivo que permitirá ás persoas asistentes experimentar, a través de xogos e probas, algúns dos retos que afrontan no seu día a día as persoas con discapacidade. Ademais, instalarase un posto informativo sobre os recursos e servizos da asociación, e proporcionarase información sobre dereitos e beneficios asociados ao certificado de discapacidade e á solicitude de dependencia.

A xornada pecharase pola tarde coa intervención do presidente de AGORA, Isaac Rodríguez e o Alcalde de Monforte de Lemos, José Tomé Roca. Ao finalizar o acto, realizarase un pequeno sorteo entre as persoas participantes. Esta iniciativa ten como obxectivo visibilizar o traballo realizado por AGORA e promover a inclusión e sensibilización en torno á discapacidade na nosa sociedade