A Xunta de Goberno da Deputación vén de aprobar este venres a adxudicación das obras de mellora en dúas estradas provinciais ao seu paso polo concello de Pantón por un importe conxunto que ascende e preto de 155.000€.

Trátase da LU-P-4107, que une Segade coa aldea de Marce. O arranxo realizarase dende o inicio da vía ata o punto quilométrico 4,5 cun orzamento de case 87.000€; e destinaranse preto de 68.000€ á mellora da LU-P-4106, que vai desde a zona do Carme ata Curro para acondicionar algo máis de 6 quilómetros desde o inicio desta vía. O prazo de execución é de dous meses.

Así o avanzou tras a reunión celebrada esta mañá no Pazo de San Marcos o Deputado de Promoción Económica e Social, Pablo Rivera Capón, quen sinalou que estas novas obras “forman parte do esforzo inversor da institución por seguir mellorando no conxunto da provincia a rede viaria provincial,  a máis extensa de todas as Deputacións de España con máis de 4200 quilómetros, e tres veces maior ca da propia Xunta de Galicia en Lugo”.