Ás 18:30 horas deste xoves 5 de decembro, o Alcalde de Monforte, acompañado por varios Concelleiros e Concelleiras do Equipo de Goberno, procedía ao acendido oficial da iluminación de Nadal do concello.
Fíxoo premendo o botón característico destes eventos cada ano máis presentes no preludio das Festas de Nadal e diante dun gran cono de 20 metros de altura e 6 de diámetro que simboliza unha árbore de Nadal no comezo da céntrica Rúa do Cardeal. En palabras de José Tomé, referíndose á devandita árbore, “con ela queremos transmitir unha nova esperanza, para que a xente poida facerse fotos no seu interior e para inxectar ilusión e alegría nas persoas que viven ou que visitan Monforte”.
O momento do acendido estivo moi concorrido, con centos de persoas presentes, destacando entre elas moita cativada entusiasmada e o grupo monfortino de batucada Baturruka que quixo participar deste encontro desinteresadamente. Prendidas as luces oficialmente onde a árbore, a comitiva e toda a xente acompañante desprazáronse dende a rúa do Cardeal ata a Praza de España, onde está situada unha vistosa Estrela de Nadal.
O Executivo de José Tomé investiu no alumeado de Nadal deste ano 57.000 €, sendo o maior investimento na historia de Monforte, 5.000€ máis que en 2023, o que significa case un 10% de incremento.
O Alcalde resalta que “dende o Concello potenciamos o alumeado de Nadal para impulsar o comercio e a hostalería, que son piares básicos da nosa economía. Deste xeito, alcanzamos os 1,2 millóns de luces Led neste Nadal, e incrementamos o número de arcos colocados, ata os 264 arcos, distribuídos en 66 rúas da cidade, unha máis que o ano pasado”. A maiores das rúas devanditas están iluminadas a Torre da Homenaxe, a Praza de España, o Campo de San Antonio, a Praza de Carude, a Praza dos Chaos, a Praza da Estación, e 7 arcos de “Bo Nadal” que se ubican nas entradas á cidade de Monforte.
O alumeado funcionará ata o luns 6 de xaneiro de 2025, día de Reis. O horario de acendido será de 18:30 a 2 da madrugada.
