A adega Lar de Ricobao, asentada na Ribeira Sacra e gañadora de numerosos premios en concursos nacionais e internacionais apostando por edicións limitadas de viños, vén de anunciar un novo proxecto. Trátase dunha colaboración coa destilería cántabra Siderit para elaborar whiskys de alta calidade.

Segundo explican fontes da adega quiroguesa, “nesta primeira colaboración empregaranse 9 barricas de 100 litros que conteñen variedades godello, branco lexítimo e o coñecido como “orange wine”. Despois de baleiradas serán reenchidas co destilado e farase un seguimento da evolución do whisky durante varios anos, observándose os matices que lles deixan os devanditos viños”. A previsión é que os whiskys estean listos para a súa comercialización aos 5 ou 6 anos dende que comece o seu envellecemento nas barricas.

A destilería Siderit conta cun gran recoñecemento e diferentes premios na súa traxectoria no sector da xenebra e agora busca facerse cun nome no sector do whisky, sector no que algunha das súas elaboracións recibiu a medalla de ouro en concursos internacionais.

Pola súa banda, a adega Lar de Ricobao conta cunha traxectora ascendente e caracterízase por realizar edicións moi limitadas de viños nos que se coida moito a materia prima e a súa producción realízase co máximo mimo e control. A uva empregada nas súas elaboracións prodúcese en fincas moi próximas á adega para poder facer un seguimento en todas as fases de crecemento e maduración, feito que garantiza a calidade que buscan.