Os Reis Magos de Oriente xa visitaron o Concello de Sober. Empezaron a súa visita pola Residencia Nosa Señora do Carme ás 11:00 h. onde chegaron ben acompañados por unhas axudantas para poder repartir os agasallos con máis axilidade.
As seguintes paradas foron A Cantina dos Meus Avós, en Bulso, onde os recibiron con doces e roscón; seguindo a continuación polo Local Social de Anllo-Santo Estevo, e rematando ás 12:30 h. no Centro Sociocultural de Sober. Neste último punto foron recibidos polo Alcalde, Luis Guitián, e por unha chea de cativos e cativas que recolleron os seus agasallos.
CANTOS DE REIS E ENTREGA DE PREMIOS DOS CERTAMES
O pasado venres 3 de xaneiro, o Centro Sociocultural foi tamén protagonista na actividade social e cultural do concello. Despois dunha actuación de narración oral tivo lugar a entrega de premios nos diferentes certames convocados polo concello: certame de postais –categorías A, B e D–, certame de beléns –categorías infantil e adultos–, e certame de decoración de locais comerciais. Pódense ver os e as gañadores/as na páxina de Facebook do concello.
E como remate, houbo un Concerto de Reis a cargo da formación musical local O Trícole, e unha chocolatada para o público presente.
