A igrexa nova de Chantada, parroquia de Santa Mariña, acolle ata o 28 de febreiro a exposición “Palabra e Memoria” sobre o uso da lingua galega nos cemiterios. Esta experiencia sobre a normalización da epigrafía funeraria en idioma galego é unha iniciativa cultural do IES Pedrouro do Concello de Burela que desde o 2003, a través da área de innovación deste centro, vén estudando o uso da lingua galega nas inscricións funerarias. A combinación do traballo de campo e a súa divulgación reflíctense nesta mostra fotográfica con imaxes tomadas pola fotoxornalista, Pepa Losada, coa colaboración posterior de María Mon e Aida López.
Palabra e Memoria exposición / Concello de Chantada
Palabra e Memoria chegou ás parroquias do termo municipal de Chantada por iniciativa da filóloga local, Tania Vázquez García, docente do Instituto Val do Asma. Ata o de agora no concello de Chantada foron estudados 17 cemiterios. No camposanto da parroquia de San Salvador de Asma, Tania Vázquez, visualizou as inscricións realizadas por 253 familias e descubriu que 6 delas xa abriron as portas ao idioma galego escrito. Pola súa parte, en San Xurxo a porcentaxe é lixeiramente menor, de 246 familias, 3 usaron o galego para os textos de lembranza aos seus familiares. En Líncora e Camporramiro os resultados son semellantes. O cambio de tendencia ao uso do galego produciuse nestes últimos anos e débese ao relevo xeracional: as alfabetizadas en galego nos primeiros anos da etapa democrática pasan agora a ocuparse do coidado do lugar en que respousan definitivamente os seus parentes.
Palabra e Memoria exposición / Concello de Chantada
A exposición documenta o uso da lingua galega na epigrafía funeraria e enfatiza a súa recuperación convidando a expresar de xeito sentido e propio os sentimientos cara aos seres queridos que xa non están.
A información panorámica de “Palabra e Memoria” está publicada polo Consello da Cultura Galega na “Cartografía do uso do galego nos camposantos” (https://datawrapper.dwcdn.net/4HeuT/38/), que contén información sobre 142 cemiterios e que está aberto á colaboración cidadá.
Palabra e Memoria exposición / Concello de Chantada
