CGT expresa no seu comunicado, que as traballadoras sociais deben estar en posesión da titulación de diplomadas en traballo social, ademais de estar colexiadas para o desempeño das súas funcións, como así o establece a lei. E informan de ter coñecemento de que as devanditas traballadoras non están dadas de alta no Colexio de Traballadores Sociais de Galicia.

“Este suposto constituiría un caso de intrusismo profesional e que vulneraría o prego de condicións técnicas polo que a empresa “Os Ventos Innovación S.L.” presta os seus servizos, así como a lexislación penal”, explican.

Mentres desde Por Chantada lembran que no verán denunciaron o incumprimento da normativa autonómica, coa ausencia de traballadoras sociais ao atenderse virtualmente desde Santiago o servizo. Segundo a concelleira de Por Chantada, Helena Fernández, “é unha obviedade que o Servizo de Axuda no Fogar ten una especial prevalencia na afectación á saúde física e mental das persoas traballadoras que só se pode explicar desde o recoñecemento dunhas condicións laborais inaceptábeis na prestación dun servizo público e esencial, que debería asumir a Xunta para ter condicións iguais en todos os concellos da Galiza e pór fin ás asimetrías e o elevado cofinanciamento para os concellos e mesmo para a Deputación que destina unha parte do Plan Único para o SAF”.

Desde Por Chantada lamentan “gastar máis dun millón de euros ao ano nun servizo que funciona cada vez pior desde que foi privatizado e onde o goberno local ampara todas estas irregularidades», afirma Antom Fente.

Con todo, a formación política demanda a rescisión do contrato e unha nova licitación do servizo ou, “mellor aínda, a súa remunicipalización, esixindo que o alcalde e a concelleira de Servizos Sociais dean a cara e interveñan dunha vez ante os continuados incumprimentos dos pregos do contrato que prexudican ás auxiliares e ás familias dos usuarios”.