O pasado luns 17 de febreiro o IES Daviña Rey tivo a oportunidade de acoller unha charla sobre a doazón de órganos por parte dous expertos na materia, Miguel Ángel Fernández e Delia Lorenzo Zarandona.
No trascurso da conferencia explicouse a importancia da solidariedade na doazón e como salvar vidas mediante este acto, así como a importancia da Sanidade Pública. Abordáronse os procedementos médicos e legais involucrados, destacando que calquera persoa pode ser doante se así o desexa. Ademais, comentan dende a Dirección do centro, “desmentíronse mitos comúns, fomentouse a reflexión sobre a importancia de falar coa familia sobre as decisións de doazón e fíxose énfase na relevancia da concienciación xuvenil para xerar un cambio positivo na sociedade”.
Ao longo do acto o alumnado tivo a oportunidade de preguntar para aclarar dúbidas xurdidas sobre o tema.
GALICIA, EXEMPLO EN DOAZÓNS DE ÓRGANOS
O Servizo Galego de Saúde (Sergas) alcanzou en 2024 unhas cifras que lle fixeron bater a súa propia marca tanto en transplantes de órganos realizados (424) como en doantes (137), mentres que a lista de pacientes que están á espera de recibir un órgano caeu ao mínimo histórico, con 193.
O principal dato son os 424 transplantes realizados no Sergas en 2024, máis dun ao día e seis deles de urxencia. Esta cifra global supón un incremento dun 28% con respecto a 2023 –cando foron 331– e unha taxa de 157 por cada millón de habitantes. Toda unha marca en Galicia desde que en 1981 arrincou o programa de doazóns.
